ՀՀ ոստիկանության պարեկային ծառայությունում իրենց ծառայությունը շարունակում են ճանապարհային ոստիկանության նախկին 58 ծառայող եւ պարեկապահակակետային ծառայության ոստիկանության գնդի նախկին 156 ծառայող։ Այս մասին «Հայկական ժամանակ»-ի գրավոր հարցմանն ի պատասխան հայտնեցին ՀՀ ոստիկանության հասարակայնության հետ կապի եւ լրատվության վարչությունից:

Նշենք, որ հուլիսի 7-ից Երեւանում իր աշխատանքն է սկսել պարեկային ծառայությունը: Վարչապետի պաշտոնակատար Նիկոլ Փաշինյանը հայտարարել էր, որ պարեկային ծառայությունում 698 ծառայող կա եւ անձնակազմի 70 տոկոսը մարդիկ են, ովքեր նախկինում ոստիկանությունում չեն աշխատել:

ՀԺ-ն ոստիկանությունից հետաքրքրվել էր նաեւ, թե ՃՈ եւ ՊՊԾ քանի՞ աշխատակից է ազատվել աշխատանքից, ինչին ի պատասխանեց նշեցին. «ՀՀ ոստիկանությունում նոր պարեկային ծառայության կազմավորման արդյունքում՝ տվյալ ծառայությունում համապատասխան պաշտոնների չնշանակված ծառայողներին առաջարկվելու են այլ պաշտոններ: Իսկ ոստիկանությունում ծառայությունից ազատվածների թվաքանակի վերաբերյալ տեղեկատվություն տրամադրելը իրատեսական չէ, քանի որ ոստիկանությունում կադրային շարժը, հոսունությունը կրում է շարունակական բնույթ: Բացի այդ, ներկայիս փուլում դեռեւս քննարկվում է պարեկային ծառայությունում չնշանակված լուծարված ստորաբաժանման ծառայողների հետագա ծառայության հարցը»։