Հայաստանում «Սպուտնիկ Վի» պատվաստանյութի համատեղ արտադրությանը ընթացք է տրվել, արդեն իսկ կան արտադրված նմուշներ, որոնք կանցնեն որոշկի փորձաքննությունների: Այս մասին այսօր Կառավարության նիստից հետո հայտարարեց Առողջապահության նախարարի պաշտոնակատար Անահիտ Ավանեսյանը, նշելով՝ այդ փորձաքննություններից հետո միայն պարզ կլինի պատվաստանյութի հետ կապված հետագա ընթացքը:
Հայաստանի էկոնոմիկայի նախարարությունը ռուսական կողմի հետ բանակցում էր կորոնավիուսի դեմ «Սպուտնիկ Վի» ռուսական վակցինան արտադրելու հարցի շուրջ: Այդ մասին հայտնի էր դարձել դեռևս այս տարվա ապրիլի 12-ից: Ապրիլի 28-ին լրագրողների հետ զրույցում փոխվարչապետի պաշտոնակատ Տիգրան Ավինյանն էլ հայտնել էր, որ «Սպուտնիկ Վի-ի» համատեղ արդատրությունը հնարավոր կլինի կազմակերպել Հայաստանի Մոլեկուլային կենսաբանության ինստիտուտում. «Ռուս գործընկերների հետ մի փոքր ավելի մանրամասն պետք է հասկանալ, թե ինչ չափով, որ կոմպոնենտներով հնարավոր կլինի այդ արտադրությունը կազմակերպել այստեղ»,- ասել էր նա:
Բացի «Սպուտնիկ Վի»-ի համատեղ արտադրությունը, Ռուսաստանի նախագահ Վլադիմիր Պուտինը և ՀՀ վարչապետի պաշտոնակատար Նիկոլ Փաշինյանը պայմանավորվել էին, որ Հայաստանին կտրամադրվի պատվաստանյութի 1 մլն դեղաչափ: Ավելի վաղ Ավինյանն էլ հաստատել էր, որ ձեռք բերված պայմանավորվածությունն ուժի մեջ է: «Որոշակի գործընթացներ տեղի են ունենում: Մենք բոլոր հնարավոր պատուհաններն օգտագործելու ենք և ֆինանսական միջոցները հատկացնելու ենք, որպեսզի ապահովենք լուրջ խմբաքանակ՝ այս տարվա պատվաստումների համար»,- ասել էր նա:
Առողջապահության նախարարի պաշտոնակատար Անահիտ Ավանեսյանը հավելեց, որ «Սպուտնիկ Վի» պատվաստանյութի առաջին և երկրորդ դեղաչափերը տարբեր բաղադրիչներ պարունակող դեղաչափեր են, և Հայաստանը ստանում է այդ երկու դեղաչափերը միարժամանակ: