Այսօր՝ հունվարի 26-ին, Կառավարության հերթական նիստում վարչապետ Նիկոլ Փաշինյանը նշեց, թե հիմա կասեն՝ այս ինչ է քննարկում Կառավարությունը, երբ տարածաշրջանում իրավիճակը լարված է, երբ նախորդ շաբաթ տեղի ունեցած հրդեհի կսկիծը բոլորիս ուսերին ծանրացած է և դեռ երկար է ծանրացած մնալու. «Ես ուզում եմ ասել, որ խոսքը երկրում ստանդարտների հաստատման մասին է, և մեր պրոբլեմն այն է, որ մենք չենք դիտարկում և չենք տեսնում կապը, ասենք, երթևեկության կարգապահության, ստանդարտների բացակայության կամ չկիրառման և տեղի ունեցող աղետների միջև: Երկրում պետք է լինեն ստանդարտներ: Բոլոր պրոբլեմներին մեր արձագանքը պետք է լինի ասիմետրիկ և ադեկվատ: Բոլոր պրոբլեմների լուծումը ինստիտուտների կայացումն է»:
Նրա խոսքով՝ մի հեռավոր գյուղական բնակավայրում տասնյակ ճանապարհային նշաններ են դրված, ինչը շատ բան է փոխում երկրի արտաքին և ներքին միջավայրի համար. «Բայց մեծ պրոբլեմներ կան երկրում գծանմուշների հետ կապված: Մենք պրոբլեմ ունենք, երբ ճանապարհներ ենք հիմնանորոգում առանց ենթակառուցվածքները պատշաճ նորոգելու»:
Փաշինյանը նշեց, որ ինքը մարզերից մեկում ականատես է եղել, թե ինչպես է աղբը լցվել դատարկ աղբամանների շուրջ, և պետք էր նորից աղբահանություն կատարել. «Սա էլ է ստանդարտի խնդիր»:
