ՌԴ նախագահ Վլադիմիր Պուտինը հեռախոսազրույց է ունեցել Հայաստանի Հանրապետության վարչապետի պաշտոնակատար Նիկոլ Փաշինյանի հետ: Ռուսաստանի նախագահը շնորհավորել է Նիկոլ Փաշինյանին Ազգային ժողովի արտահերթ ընտրություններում իր գլխավորած "Քաղաքացիական պայմանագիր" կուսակցության հաղթանակի կապակցությամբ և հաջողություններ մաղթել Հայաստանի նոր կառավարության ձևավորման գործընթացում: Հաստատվել է հայ-ռուսական դաշնակցային հարաբերությունների առավել ամրապնդման փոխադարձ տրամադրվածությունը։
Արցախի վերաբերյալ կարծիքների փոխանակման ընթացքում կարեւորվել է Ռուսաստանի, Հայաստանի եւ Ադրբեջանի ղեկավարների 2020 թվականի նոյեմբերի 9-ի եւ 2021 թվականի հունվարի 11-ի պայմանավորվածությունների հետեւողական իրականացումը: Տվյալ համատեքստում ՀՀ վարչապետի պաշտոնակատարի կողմից ընդգծվել է ռազմագերիների վերադարձի առաջնային նշանակությունը: Ռուսական կողմը կշարունակի ակտիվ միջնորդական ջանքերը՝ ուղղված տարածաշրջանում կայունության ապահովմանը։