Գլխավոր հերոսը՝ Արամը հասուն տղամարդ է, որը մեծ հիասթափություն է ապրել ու այլևս չի հավատում սիրուն: Կինը՝ Ռոզին հեռացել է թողնելով մեծ պարտքեր: Հիասթափությունն ու ցավը ստիպել են Արամին կենտրոնանալ աշխատանքի վրա, ինչն էլ տվել է իր ցանկալի արդյունքը: Հիմա հեռուստանովելի գլխավոր հերոսը հաջողակ բիզնեսմեն է ում սրտին տիրանալու համար պայքարում են բազմաթիվ աղջիկներ և կանայք։ Թե Արամի սրտին տիրանալու համար ինչ փորձություններ կհաղթահարեն կանայք և ի վերջո ով կդառնա նրա սրտի տերը կպարզենք շուտով:
Հեռուստադիտողների դատին շուտով կհանձնվի ևս մեկ հետաքրքիր և դեպքերի արագ զարգացում ունեցող հեռուստանովել։ Լարված սյուժե, անսպասելի, կտրուկ շրջադարձեր, որոնք կստիպեն հեռուստադիտողին գամվել հեռուստաէկրաններին և բաց չթողնել որևէ սերիա: «USArmenia TV»-ն ներկայացնում է նոր՝ «Սերը թակարդում» հեռուսատանովելը, որտեղ գլխավոր դերն այս անգամ ևս վստահված է երգիչ-դերասան Ավո Ադմայանին։
Սա Ավո Ադամյանի թվով երկրորդ համագործակցությունն է հեռուստաընկերության հետ: Ավո Ադամյանը մեծ սիրով համաձայնել է կերտել Արամի կերպարը։ Նոր հեռուստանովելի նկարահանումներն արդեն մեկնարկել են:
Նոր նախագծի փորձառու պրոդուսեր Գոհար Գրիգորյանի խոսքով՝ իրենց ամբողջ անձնակազմը շատ ուրախ է «Խաբկանք» հեռուստանովելից հետո «USArmenia TV» , «Նոր Հայաստան» հեռուստաընկերության և երգիչ–դերասան Ավո Ադամյանի հետ հերթական համագործակցության համար։ Նկարահանումները տեղի են ունենալու ինչպես Հայաստանում այնպես էլ Ամերիկայի Միացյալ նահանգներում։
Ինքը Ավո Ադամյանը մեծ պատասխանատվությամբ է մոտենում նոր նախագծին և հայտնում, որ հեռուստադիտողների մեծ լսարանը և օգտատերերի տասնյակ հազարավոր գրառումները իրեն առավել պարտավորեցնում են կերտել համոզիչ կերպար, և այն իրականություն կդառնա, վստահ է երգիչ-դերասանը: