Զինծառայողներից մեկի առողջական վիճակի հետ կապված երկու օր առաջ մի փոքր ծանրացում ունեինք, բայց երեկ հրավիրված կոնսիլիումի և բուժման մեջ փոփոխություններ մտցնելու արդյունքում այս պահին բոլորի վիճակը գնահատվում է բավարար: Այս մասին կառավարության նիստից հետո լրագրողների հետ զրույցում, անդրադառնալով ՀՀ ՊՆ N զորամասի ինժեներասակրավորային վաշտի կացարանում բռնկված հրդեհի հետևանքով տուժած զինծառայողների ծանր վիճակին, ասաց առողջապահության նախարար Անահիտ Ավանեսյանը։
«Երեք զինվորներն այժմ գտնվում են Այրվածքաբանության կենտրոնում և դեռ ստանալու են անհրաժեշտ ամբողջ ծավալով օգնությունը։ Հույս ունենք, որ բոլորն առողջացումով պետք է տուն գնան»,- ասաց նա և նշեց, որ նրանց կյանքին վտանգ չի սպառնում:
«Ես այսօր գիշերն եմ վերադարձել գործուղումից, այսօրվա ընթացքում կայցելեմ նրանց»,- ասաց նա:
