"Թվային խորհրդարանի (E-parliament) ստեղծման նպատակն է էլեկտրոնային տեղեկատվական ողջ ենթակառուցվածքի համապատասխանեցումը ժամանակակից պայմաններին, ինչպես նաև բազմաթիվ ձեռքով իրականացվող գործընթացների ամբողջական ավտոմատացումը: Թվային տեխնոլոգիաների միջոցով խորհրդարան֊ հասարակություն կապն ավելի դյուրին և մատչելի է դառնալու։ Այսօր հանդիպել եմ ՄԶԾ (UNDP) խորհրդարանական ծրագրի ղեկավարի հետ՝ քննարկելու համատեղ քայլերը և ծրագրի իրականացման ֆինանսավորումը", - Ֆեյսբուքի իր էջում գրել է ԱԺ աշխատակազմի ղեկավար, գլխավոր քարտուղար Տիգրան Գալստյանը:
Նա նաև մանրամասնեց, որ E-parliament-ը ոչ թե e-draft հարթակի նմանօրինակ հարթակ է, այլ մեծ համակարգ է, որ իր մեջ ներառում է խորհրդարանի բազմաթիվ գործընթացները, սկսած քաղաքացիների հետ աշխատանքներից մինչև աշխատակազմի ընթացիկ գործընթացների ավտոմատացումը։ Ինչ վերաբերվում է օնլայն համակարգի միջոցով քաղաքացու սեփական նամակի շարժին հետևելու հնարավությանը, թվային խորհրդարանի մոդուլները դեռ քննարկման փուլում են։