Այս տարի ոչ ստանդարտ տարի է և դրանով պայմանավորված կարգավորումները տարբերվում են նախորդ տարվա կարգավորումներից։ Այս մասին այսօր հրավիրված ասուլիսում ասաց ՀՀ կրթության, գիտության, մշակույթի և սպորտի նախարարի տեղակալ Ժաննա Անդրեասյանն՝ անդրադառնալով այն հարցին, թե այս տարի դպրոցներում գարնանային արձակուրդներ լինելո՞ւ են, թե ոչ, ե՞րբ է ավարտվելու ուսումնական տարին և ե՞րբ է նախատեսում վերադառնալ նորմալ դասապրոցեսի։
Անդրադառնալով ուսումնական տարվա ավարտին՝ Ժաննա Ադրեասյանը ասաց, որ ավարտը նույնպես միատեսակ չէ։ Մասնավորապես 12-րդ դասարանների պարագայում, որտեղ կա ավարտական և միասնական քննությունների կազմակերպման, ինչպես նաև տղաների դեպքում հետագա զորակոչի հարցեր՝ ուսումնական տարին ավարտվում է հունիսի 4-ին։ «Տարին շուտ կավարտվի նաև 1-ին և 2-րդ դասարանների համար, որոնց ուսումնական տարին ավելի կարճ է, քան մյուս դասարանների պարագայում, մյուս դասարանները կավարտեն հունիսի 18-ին»,- հավելեց նա։