Վարչապետ Նիկոլ Փաշինյանի հրաժարականի պահանջով այսօր բողոքի ցույց անող երիտասարդները անկնկալ կերպով ներխուժեցին Երեւանի պետական համալսարանի գլխավոր մասնաշենք, հասան միջազգային հարաբերությունների ֆակուլտետ: Վանկարկելով «Ուսանո՛ղ միացիր», «Առանց Նիկոլ Հայաստան», նրանք շրջեցին միջանցքներով, մտան լսարաններ՝ կոչ անելով ուսանողներին եւ դասախոսներին դասադուլ հայտարարել, դուրս գալ փողոց ու միանալ իրենց: Ի դեպ, բողոքի ցույցի ժամանակ բուհում էր նաեւ ՀՀԿ անդամ Արթինե Հովհաննիսյանը, որը միջանցքում էր ու հեռախոսով նկարահանում էր տեղի ունեցողը։
Ակտիվիստների մուտքը ԵՊՀ ոչ ոք չի խոչընդոտել: Նրանք անարգել շրջել են համալսարանի տարածքում՝ հնչեցնելով վարչապետի հրաժարականի կոչեր:
Ակցիայի մասնակիցների մոտ եկավ ԵՊՀ ռեկտորի պաշտոնակատար Գեղամ Գեւորգյանը՝ փորձելով հանդարտեցնել իրավիճակը: Նա, պատասխանելով հավաքվածների հարցին՝ վերահաստատեց, որ կառավարությունը պետք է հրաժարական։ Շարժման մասնակիցները այնուհետև քայլել են դեպի Տնտեսագիտական համալսարան: Նյութի հրապարակման պահին նրանք արդեն ներխուժել էին ՀՊՏՀ։