Այսօր ԱԺ-Կառավարություն հարցուպատասխանի ժամանակ «Քաղաքացիական պայմանագիր» խմբակցության պատգամավոր Լիլիթ Ստեփանյանը մեջբերեց Արտաքին գործերի նախկին նախարար Վարդան Օսկայնի հեղիանակած հոդվածից մի հատված, որտեղ վերջինս նշում է, թե բացի նոյեմբերի 9-ի պայմանավորվածությունից, կա նաև բանավոր պայմանավորվածություն Ադրբեջանի և Հայաստանի միջև: Ըստ Օսկանյանի՝ այն վերաբերում է Արցախը Ադրբեջանի մաս ճանաչելուն, «Զանգեզուրի» միջանցքը բացելուն, և հոդվածում նա եզրահանգման է գալիս, որ Ադրբեջանը պարբերաբար սադրիչ գործողությունների է դիմում քանի որ ՀՀ-ն այս քայլերը չի կատարում:
ԱԳ նախարար Արարատ Միրզոյանն էլ անդրադառնալով այս հոդվածին ԱԺ ամբիոնից նշեց, որ տվյալ դա կարդալիս տարակուսանք է ապրել, պնդումների հիմքում կա թեական մի վարկած, թե կա բանավոր պայմանավորվածություն.«Եթե այդպիսի պայմանավորվածություններ չկան, ստացվում է, որ այդ ամբողջ թեզը անիմաստ բառերի միացություն է: Իսկ բանավոր պայմանավորվածություններ Ադրբեջանի հետ չկան, մենք բազմիցս այս մասին ասել ենք»:
Միրզոյանի խոսքով՝ սա ամբողջությամբ Ադրբեջանի նարատիվն է, թե Հայաստանը բան է պայմանավորվել ու չի անում:
«Ես գոնե խորհուրդ կտայի պարոն Օսկանյանին այդպիսի մտքեր շրջանառելուց առաջ այդ ասպեկտին էլ ուշադրություն դարձնել»,-ասաց նա: