Ընդդիմությունը խորհրդարանում կհրաժարվի մյուս վարչական՝ հանձնաժողովի նախագահի, փոխնախագահի պաշտոններից: Այս մասին այսօր «Ազատություն» ռադիոկայանի եթերում հայտարարել է ԱԺ ընդդիմադիր՝ արդեն նախկին փոխխոսնակ, ՀՅԴ-ական Իշխան Սաղաթելյանը՝ հավելելով, թե՝ «բոլոր պաշտոնները նվիրում են իշխանական խմբակցությանը»:
«Մենք թեկնածու չենք առաջադրի, ավելին՝ մյուս վարչական պաշտոնները, որը զբաղեցնում է ընդդիմությունը, դրանցից ևս հավանաբար այսօր կհրաժարվեն մեր գործընկերները»,- ասել է նա:
Հիշեցնենք՝ այսօր ՀՀ Ազգային ժողովը արտահերթ նիստով «Հայաստան» խմբակցության պատգամավոր Իշխան Սաղաթելյանին զրկեց ԱԺ փոխխոսնակի պաշտոնից, իսկ նույն խմբակցության պատգամավոր Վահե Հակոբյանին՝ ԱԺ տնտեսական հարցերի հանձնաժողովի նախագահի պաշտոնից:
«Քաղաքացիական պայմանագիր» խմբակցության քարտուղար Արթուր Հովհաննիսյանն էլ, լրագրողների հետ զրույցում անդրադառնալով Սաղաթելյանի այս հայտարարությանը, նշել է՝ նախնական կարող է ասել, որ չեն պատրաստվում այդ պաշտոնները լրացնել:
