Արցախյան երեք պատերազմի մասնակից Հակոբ Ասլանյանը, ով վերջին պատերազմում ստացել է լուրջ վիրավորում, որի հետևանքով տեսողությունը դեռ մինչև վերջ չի ապաքինվել, հարձակման է ենթարկվել մի խումբ անձանց կողմից: Այս մասին ֆեյսբուքյան իր էջում գրել է Քաղաքացիական պայմանագրի մամուլի խոսնակ Վահագն Ալեքսանյանը: Հակոբ Ասլանյանը ԱԺ պատգամավոր է՝ «Իմ քայլը» խմբակցությունից, նա հարձակման է ենթարկվել Ազգային ժողով մուտք գործելիս:
Ցույցի մասնակիցներից մեկը նկատելով նրան սկսել է հայհոյել և վիրավորանքներ հնչեցնել իր և իր գործընկերների հասցեին, ապա հարվածել պատգամավորին: «Լուրերի» հետ զրույցում Ասլանյանը տեղեկացրեց, որ հանցագործության մասին հաղորդում է ներկայացրել ոստիկանություն:
«Ես փորձեցի զուտ մարդկային տեսակետով ասել, որ քեզ կոռեկտ պահիր, և նա իր մեջ հավաքած կեղտը միանգամից շուռ տվեց ինձ վրա և սկսեց հայհոյել, և երբ փորձեցի ասել, որ դա ճիշտ չէ, ինքը հասցրեց հարվածել»: Կարծում եմ՝ նման մարդիկ պետք է պատժվեն,- ասաց պատգամավորը: