Այսօր ԱԺ-ում ՀՀ վարչապետ Նիկոլ Փաշինյանը ներկայացնում է Կառավարության ծրագրի կատարման ընթացքի և արդյունքների մասին 2020թ․ տարեկան զեկույցը:

Մինչ զեկույցի ներկայացնելը Փաշինյանը շնորհավորեց եզդիական համայնքին Նոր տարվա կապակցությամբ՝ նշելով, որ շնորհակալ է եզդիական համայնքից՝ բոլոր ջանքերի և ՀՀ-ի համար ունեցած ներդրման համար:

Անցնելով զեկույցին՝ Փաշինյանն ընդգծեց՝ 2019 թվականը մեզ համար եղել է աննախադեպ  հաջող տարի.

«2019-ին մենք ունեցանք 7,6 տոկոս տնտեսական աճ, շուրջ 63 միլիարդ դրամով գերակատարեցինք բյուջեի եկամտային մասի՝ նախապես ծրագրված մասը: 2020 թվականի հունվար-փետրվար ամիսներին ՀՀ-ում արձանագրվեց ավելին քան 9 տոկոս տնտեսական ակտիվություն, բայց մարտից արդեն ՀՀ մուտք գործեց կորոնավիրուսը, և մեզ մոտ սկսվեց ճգնաժամային ժամանակաշրջան: Թվում էր, թե կորոնավիրուսը լինելու է մեզ համար վատագույն հիշողությունը, բայց սեպտեմբերին մենք ունեցանք 44-օրյա պատերազմը՝ ծանր հետևանքներով:

ՀՀ կառավարությունը 2020-ին իրականացրել է ճգնաժամային կառավարում: Առաջին փուլում այդ կառավարումը կապված էր կորոնավիրուսի հետ, որի արդյունքում ՀՀ-ի ավելին քան 200 հազար քաղաքացիներ վարակվել են կորոնավիրուսով, ունեցել ենք 3770-ից ավելի մահեր կորոնավիրուսից, միևնույն ժամանակ, իրականացրել ենք 25-ից ավելի հակաճգնաժամային միջոցառումներ, որոնց շրջանակներում աջակցություն է ստացել շուրջ 1,1 միլիոն ֆիզիկական անձ, 83 հազար իրավաբանական անձ: Շահառուներին հասանելի է եղել 239 միլիարդ դրամ կորոնավիրուսի հակաճգնաժամային փաթեթի շրջանակներում, որից պետբյուջեի ծախսը 55 միլիարդ դրամ է, փոխառում միջոցները պետական բյուջեից՝ 20 միլիարդ դրամ»: