Արցախյան 44-օրյա պատերազմի ընթացքում զոհված զինծառայողների 50 մասունք շուտով կտեղափոխվի Հոլանդիա՝ փորձաքննության համար: Այս մասին այսօր Կառավարության նիստից հետո լրագրողների հետ ճեպազրույցում ասաց առողջապահության նախարարի պաշտոնակատար Անահիտ Ավանեսյանը:
Ըստ նրա՝ այժմ ընթանում է մասունքները Հոլանդիա տեղափոխելու գործընթացը:
«Ցավոք, բարդ փորձանմուշներ կային, որոնք մենք չէինք կարողանում նույնականացնել և հոլանդացի գործընկերների հետ կնքեցինք համաձայնություն: Չեմ կարծում, որ դիերի նույնականացման վերաբերյալ պատասխանը շուտ կլինի, որովհետև նրանց կողմից էլ բավական բարդ փորձաքննությունների ընթացք պետք է արվի, և երբ որ հայտնի լինի պատասխանը, մենք այն կհանրայնացնենք»,- ասաց նա:
Հիշեցնենք՝ արցախյան 44-օրյա պատերազմի ընթացքում պատերազմի մասնակիցների 100-ից ավելի նույնականացված մարմիններ կային, որոնք տարբեր պատճառներով հարազատները չէին վերցրել: Շուրջ 50 մասունքից էլ նույնիսկ 4-րդ, 5-րդ, 6-րդ փորձից հետո ԴՆԹ չէր անջատվում: Ավելի վաղ առողջապահության նախարարի պաշտոնակատար Անահիտ Ավանեսյանը մեզ հետ զրույցում նշել էր՝ զոհված զինծառայողների դիերի մի մասը նրանց ծնողներն ու հարազատներն արդեն վերցրել են:
