Եռակողմ աշխատանքային խմբում չի քննարկում Հայաստանի տարածքով դեպի Նախիջևան միջանցք բացելու հարց: Այս մասին լրագրողների հետ ճեպազրույցում ասաց ՌԴ փոխվարչապետ Ալեքսեյ Օվերչուկը՝ պատասխանելով լրագրողի ճշտող հարցին:
«Ոչ, այդ հարցը չի քննարկվում։ Քննարկվում է Հարավայի Կովկասում տնտեսական, տրանսպորտային ուղիների ապաշրջափակման հարցը», - ասաց Օվերչուկը:
Փոխվարչապետ Մհեր Գրիգորյանի կարծիքով` տարածաշրջանը կայունացնող ցանկացած հնարավորություն պետք է օգտագործել: Ճեպազրույցի ընթացքում լրագրողներից մեկը հիշեցրեց, որ հայկական կողմը բազմիցս հայտարարում էր այն մասին, որ առանց Ադրբեջանի զորքերի Հայաստանի տարածքից դուրսբերման և հայ ռազմագերիների վերադարձման հայկական կողմը չի վերսկսի բանակցությունները Ադրբեջանի հետ, այնինչ՝ բանակցությունները փաստացի վերսկսվել են:
«Ցանկացած շանս, որը կայունացնում է տարածաշրջանում իրավիճակը և բերում է խաղաղություն, պետք է օգտագործել»,- հիշեցմանն ի պատասխան՝ նշեց Մհեր Գրիգորյանը, մեկտեղ նկատելով, որ Ադրբեջանի հետ պետք է խոսել և բանակցել:
Խոսելով եռակողմ աշխատանքային խմբի գործունեության մասին` փոխվարչապետը հայտնեց, որ այս պահին տարածաշրջանի երկաթգծերի վերականգնման մասով եռակողմ աշխատանքային խմբի համար տեսանելի են լուծումները, որովհետև խոսքն այն երկաթգծերի վերականգման մասին է, որոնք ժամանակին եղել են և գործել են:
«Այդ մասով ավելի շատ կենտրոնացված ենք իրավական լուծումների վրա` սահմանային, մաքսային, ֆիտոսանիտարական և այլ նմանատիպ հսկողական գործառույթ կազմակերպելու ուղղությամբ: Ճանապարհների վերականգնման մասով դեռևս ավելի շատ քննարկվում է տեխնիկական լուծումների հարցը»,- եզրափակեց Գրիգորյանը:
