Այսօր մենք ականատեսն ենք մի իրավիճակի, երբ հասարակության յուրահատուկ մտածելակերպի պատճառով մարդկանց կողմից չի ցուցաբերվում պատշաճ վերաբերմունք և լրջություն կորոնավիրուսային համավարակի հանդեպ: Քաղաքացիները դիմակը կրում են ոչ թե իրենց ծեր հարազատներին պաշտպանելու կամ պոտենցիալ վարակակիրներից իրենց պաշտպանելու համար, այլ միայն այն պատճառով, որպեսզի չտուգանվեն: Ամենայն հավանականությամբ, հենց այդպիսի անլուրջ վերաբերմունքն է հանդիսանում պատճառը, որ այսօր մենք ունենք օրական 100-ից ավել վարակակիր, իսկ այսօր արդեն 500-ից ավել նոր հաստատված դեպք:

Այսպես, թե այնպես, բժշկական դիմակները պաշտպանում են վարակից, եթե պահպանվում են հիգիենայի կանոնները։ Առողջապահության նախարարությունը ինչպես ֆեյսբուքով, այնպես էլ հեռուստատեսությամբ բազմաթիվ հոլովակներ հրապարակել և հեռարձակել, թե ինչպես ճիշտ կրել բժշկական դիմակը: Առաջին հերթին, դիմակը պետք է այնպես կրել, որ այն միաժամանակ փակի քիթն ու բերանը, երկրորդ՝ մեկանգամյա դիմակը պետք է փոխարինվի նորով, երբ այն խոնավացել է,կամ կրելուց անցել է առավելագույնը մոտ 3 ժամ: Միևնույն բժշկական մեկանգամյա դիմակները ոչ միայն պիտանի չեն մեկից ավել օգտագործման համար, այլ նաև վտանգավոր են հենց դիմակը կրողի առողջության համար:

Դիմակը կրելու կանոնների պահպանումը այսօր արդեն օրվա հրամայական է դարձել, որովհետև մենք ամեն օր հանդիպում ենք այնպիսի իրավիճակների, երբ տրանսպորտային կանգառներում իրադրությունը մեղմ ասած հուսադրող չէ: Որպես օրինակ, հենց այս լուսանկարում տիրող իրավիճակը, երբ կանգառում տրանսպորտի սպասող քաղաքացիներից միայն մեկն է ճշգրիտ պահպանել դիմակը կրելու կանոնները:

Լուսանկարը՝ Անդրանիկ Ավետիսյանի