Այսօր հոկտեմբերի 27-ի ոճրագործության 21-րդ տարելիցն է: 1999 թվականի այս օրը զինված հանցագործների մի խումբ ներխուժեց Ազգային Ժողով ու գնդակահարեց պետական այրերի: Ահաբեկչությանը զոհ գնացին Ազգային Ժողովի նախագահ Կարեն Դեմիրճյանը, վարչապետ Վազգեն Սարգսյանը, ԱԺ փոխնախագահներ Յուրի Բախշյանն ու Ռուբեն Միրոյանը, պատգամավորներ Արմենակ Արմենակյանը, Հենրիկ Աբրահամյանը, Միքայել Քոթանյանը և օպերատիվ կառավարման նախարար Լեոնարդ Պետրոսյանը:
Դատարանը 2003 թվականի դեկտեմբերի 2-ին արձակեց դատավճիռը. նրանցից վեցը, այդ թվում՝ Նաիրի Հունանյանը, նրա եղբայր Կարեն Հունանյանը, նրա մորեղբայրը՝ Վռամ Գալստյանը, Դերենիկ Բեջանյանը, Էդիկ Գրիգորյանը և Աշոտ Կնյազյանը դատապարտվել են ցմահ ազատազրկման: Համլետ Ստեփանյանը դատապարտվել է 14 տարվա ազատազրկման:
Նախորդ տարի 27-ի զոհերից Յուրի Բախշյանի այրու՝ Անահիտ Բախշյանի միջնորդության հիման վրա ահաբեկչության կազմակերպիչների և հովանավորների վերաբերյալ գործի անջատված մասի նախաքննությունը վերսկսվեց, ԱԱԾ-ում ստեղծվել է քննչական խումբ:
Զոհված Արմենակ Արմենակյանի կինը լրագրողների հետ զրույցում նշեց. «Ամեն անգամ այս օրը մեր ընտանիքներում հիշում ենք այնպես, ինչպես առաջին օրը: Այդ բոթը ցնցեց մեզ, մեր ընտանիքներին, մեր բարեկամներին, հայ ժողովրդին: Դա, կարելի է ասել, մեծ ահաբեկչություն էր, ոճրագործություն»:
Ըստ կնոջ՝ Արմենակ Արմենակյանի սպանությունն առ այսօր առեղծված է: «Արմենակը չէր կարող միջանցքում հանգիստ նստել՝ լսելով կրակոցներ: Նա, կարծում եմ, որ այդտեղ չի եղել: Վարկած կա, որ եղել է ճաշարանում: Բացի այդ 5 հոգուց, եղել են այլ մարդիկ, որոնք գուցե վախից դրդված, որ Արմենակ Արմենակյանը տեսել է իրենց, և, վրեժխնդիր կլիներ, վախից նրան սպանել են»,-ասաց նա:
Արմենակյանի կինը նշեց, որ դիմել են նաև գործող կառավարությանը, որպեսզի վերաբացվի Հոկտեմբերի 27-ի գործը, որպեսզի հասկանան, թե ովքեր են կանգնած եղել այդ ոճրագործության թիկունքում:
ԱԺ նիստի մեկնարկից առաջ պատգամավորները 1 րոպե լռությամբ հարգեցին մարտի դաշտում ընկածների ու հոկտեմբերի 27-ի զոհերի հիշատակը: Պանթեոնում հարգանքի տուրք է մատուցվել։ ԱԺ պատգամավորներն այսօր ծաղիկներ են խոնարհել Ազգային ժողովի բակում հոկտեմբերի 27-ի զոհերի հիշատակը հավերժացնող հուշարձանի մոտ:
