ՀՀ կրթության, գիտության, մշակույթի և սպորտի նախարար Վահրամ Դումանյանը հանդիպել է նախարարության ենթակայությամբ գործող համերգային կազմակերպությունների տնօրենների և գեղարվեստական ղեկավարների հետ: Հանդիպմանը մասնակցել է նաև նախարարի տեղակալ Արա Խզմալյանը:

Ողջունելով ներկաներին՝ նախարարը նշել է, որ հանդիպման նպատակը ճանաչողական բնույթ ունի՝ ծանոթանալու երաժշտարվեստի ոլորտի պատասխանատուների հետ:

«Ինձ համար հաճելի է վայելել ոչ միայն ձեր արվեստը, այլև ձեզ հետ վարել գործնական զրույցներ, վեր հանել ոլորտում առկա խնդիրներն ու քննարկել դրանց լուծման ուղիները: Գիտեմ՝ խնդիրները քիչ չեն, սակայն վստահ եմ, որ համատեղելով բոլորիս ջանքերը՝ ժամանակի ընթացքում կունենանք լուծումներ: Եվ ես ակնկալում եմ ձեր՝ արհեստավարժ մասնագետներիդ աջակցությունն առկա դժվարությունները միասին հաղթահարելու գործում: Հատկանշական է, որ համավարակի պայմաններում և պատերազմից հետո հասարակության շրջանում առկա է անկումային տրամադրություն, սակայն մենք կոտրվելու իրավունք չունենք, և այս առումով հոգևոր-մշակութային գործունեությունը բուժիչ առաքելություն ունի: Գտնենք մեր ժողովրդին դրական և լուսավոր լիցքեր հաղորդելու լավագույն ձևերը, միջոցները»,- ընդգծել է նախարար Վ. Դումանյանը և այդ նպատակին հասնելու համար ցանկացած ուղիներ գտնելու պատրաստակամություն հայտնել:

Նախարարի տեղակալ Արա Խզմալյանը նշել է, որ ինչպես թատերական, այնպես էլ համերգային կազմակերպությունների ղեկավարները համավարակի և պատերազմական դրության պայմաններում լուրջ աշխատանքներ և գործուն ջանքեր են ներդրել, որպեսզի կազմակերպությունների գործունեությունը չընդհատվի: Նա մեկ անգամ ևս շնորհակալություն է հայտնել գործընկերներին քաղաքացիական բարձր գիտակցության և արհեստավարժության համար:

Այնուհետև Արա Խզմալյանը նախարարին տեղեկացրել է համերգային կառույցներում, մասնավորապես՝ Երգի պետական թատրոնում, Կամերային երաժշտության ազգային կենտրոնում, կապիտալ նորոգումների, տեխնիկական հագեցվածության, երաժշտական գործիքների ձեռքբերման, ինչպես նաև «Արամ Խաչատրյան» համերգասրահում բարեփոխումների, նոր ծրագրերի մասին: Կարևորելով իրականացված աշխատանքները՝ Վ. Դումանյանը վստահեցրել  է, որ առաջիկայում կայցելի համերգային կազմակերպություններ՝ տեղում  ծանոթանալու կատարված  աշխատանքներին:

Համերգային կառույցների ղեկավարները հակիրճ ներկայացրել են իրենց առաջարկները՝ միտված ոլորտի բարեփոխումներին, և տեղեկացրել առաջիկա ծրագրերի մասին:

«Նախատեսված համերգային ծրագրերն անհրաժեշտ է իրականացնել նաև մարզերում, սահմանամերձ համայնքներում և Արցախում»,- կարևորելով մշակույթի ապակենտրոնացման և մարզերում ու Արցախում կրթամշակութային կյանքի ակտիվացման անհրաժեշտությունը՝ նշել է նախարար Վ. Դումանյանը:

Նախարարը նաև հավելել է՝ այս տարին բաբաջանյանական ու միրզոյանական է, և հայ մեծանուն կոմպոզիտորների հոբելյանների պատշաճ նշման նպատակով կստեղծվեն կառավարական հանձնաժողովներ:

Հանդիպման ավարտին նախարարը վերահաստատել է իր պատրաստակամությունը՝ առկա դժվարությունները միասնական ջանքերով լուծելու ուղղությամբ և ներկաներին շնորհակալություն հայտնել կատարած աշխատանքի համար:

Պատգամավորները դժգոհ են հանքարդյունաբերության ոլորտն ուսումնասիրող քննիչ հանձնաժողովի աշխատանքից

«Ո՞րն է Ձեր աշխատանքի այն կոնկրետ արդյունքը, որն առաջարկությունների տեսքով մենք այստեղ կարող ենք ակնկալել: Չեմ նսեմացնում Ձեր աշխատանքը, նկատել եմ, որ դուք աշխատանք արել եք, բայց մենք կարիք ունենք կոնկրետ գործողությունների: Գոնե օրենսդրական նախաձեռնությունը մեր տիրույթում է, բայց ես այդպես էլ չտեսա օրենքի նախագծի գոնե սաղմնային վիճակ»,- հանքարդյունաբերության ոլորտն ուսումնասիրող ԱԺ քննիչ հանձնաժողովի նախագահ Սերգեյ Բագրատյանին հարցրեց «Իմ քայլը» խմբակցության պատգամավոր Արտակ Մանուկյանը:

Բագրատյանի աշխատանքի արդյունավետության մասով հարցադրումները շատ էին: ԱԺ անկախ պատգամավոր Արման Բաբաջանյանն էլ նշեց, որ հետևողականության պակաս է տեսել Բագրատյանի աշխատանքում:

«Ասում եք՝ Ապրիլյանը հրավիրեց, եկան: Ապրիլյանից հրավիրեցին, պահանջեցին, բայց Խաչատուրովը չեկավ: Չեմ կարծում՝ որևէ մեկս կարողացավ ստիպել, որ գա: Եթե մեր դեպքում էլ Անանյանը չի եկել, ես ինչ կարող էի անել: 10-15 անգամ զանգել եմ, նիստին մոտեցել, խնդրել եմ, որ մասնակցի, ոչ մի անգամ չի ասել՝ չէ, բայց չի եկել: Ոչ մի լծակ չունեմ նրան ստիպելու: Որևէ աշխատանք չկա, որ ես կատարել եմ, համարում եմ, որ դա բավարար է, սա՝ նույնպես: Խնդիրը, որ դրել եմ իմ առջև, մասամբ լուծել եմ, համարում եմ, որ թափանցիկություն ու արժանահավատություն չկա»,- ի պատասխան նշեց Բագրատյանը:

Հանձնաժողովի ցանկացած անդամ ունեցել է նույն լիազորությունները, ինչ հանձնաժողովի նախագահը: Եթե մեղադրելու բան ունեք անբավարար աշխատանքի մասով, ուրեմն ԱԺ-ի կողմից առաջադրված բոլոր անդամները հավասարապես պատասխանատու են աշխատանքի որակի համար՝ նշեց Բագրատյանը:

Հայաստանում հանքարդյունաբերողների գործունեությունն ուսումնասիրող քննիչ հանձնաժողովը փորձել է բացահայտումներ անել, բայց ինչ-ինչ պատճառներով իրականում շատ բան անել չի հաջողվել: Այդ մասին ԱԺ-ում Մետաղական հանքարդյունաբերության ոլորտում ներդրումային ծրագրերի շրջանակում գործադիր իշխանության մարմիններին ներկայացված և նրանց կողմից ընդունված ֆինանսական և այլ հաշվետվությունների օրինականությունը, հիմնավորվածությունը և արժանահավատությունը ուսումնասիրող քննիչ հանձնաժողովի կատարած աշխատանքների վերաբերյալ զեկույցի քննարկմանն ասաց ԱԺ «Իմ քայլը» խմբակցության պատգամավոր Գևորգ Պապոյանը: 

Նրա խոսքով՝ ստեղծված իրավիճակը շատ լավ բնորոշում է «Սասունցի Դավիթ» էպոսի այն հատվածը, երբ Կոզբադինը պատրաստվում է գնալ Սասուն և խոստումներ է տալիս: Պատգամավորը մեջբերում է այն. «Սասնա քար ու հող տակուվրա անենք, իմ օխտը տարվա խարջը բերենք... գնամ հիմի քանդեմ Սասուն, կանայք բերեմ քառսուն-քառսուն, քառսուն բեռնով դեղին ոսկի, տեղը ջնջեմ հայոց ազգի...»: Պապոյանը շարունակում է՝ նշելով, որ քննիչ հանձնաժողովների ստեղծումից հետո միշտ հետևում են այդ հանձնաժողովի անդամների ելույթները՝ մոտավորապես հետևյալ բովանդակությամբ. «Մեր Կոզբադին գնաց Սասուն՝ կանայք բերի քառսուն-քառսուն, քառսուն բեռով ոսկի բերի, մեր ճակատին շարան շարի, կարմիր կովեր բերի կթան.... ջա՜ն Կոզբադին, ջա՜ն Կոզբադին, սասնա Դավթին զարկեց գետնին..»: Իսկ թե ինչ է տեղի ունենում Սասունում Կոզբադինի հետ, բոլորը գիտեն: 

«Ահա թե ինչ է տեղի ունենում վերջում ստեղծվող քննիչ հանձնաժողովների հետ՝ անկախ նրանից՝ որ ոլորտն է ուսումնասիրելու»,- հայտարարեց պատգամավորը: Նա նշեց, որ չկա որևէ ապացույց, որ այս կամ այն հանքավայրը բացելու համար այսինչ խախտումներն են տեղի ունեցել, կամ գործունեության ընթացքում ինչ խնդիրներ են եղել, կամ եզրակացություն, թե ինչ պետք է անել»,- ասաց Պապոյանը՝ հավելելով, որ քննադատությունը չի ուղղում հանձնաժողովի նախագահին կամ անդամներին, այլ այն պատգամավորներին, որոնք տարբեր պատճառներով, այդ թվում՝ քաղաքական դիվիդենտներ քաղելու նպատակով, որոշում են ստեղծել քննիչ հանձնաժողովներ՝ հույսով, որ չենք պահանջելու պատշաճ հաշվետվություններ: 

«Պետք չէ ասել՝ կգանք, բացահայտումներ կանենք. չկան այդ բացահայտումները, մենք հիմա իրական խնդիրները թողած՝ ընկել ենք այլ խնդիրներ փնտրելով: Դա է պատճառը, որ ժամանակավոր հանձնաժողովները, որոնք ստեղծվել են քաղաքական նպատակահարմարությունից ելնելով՝ որևէ արդյունք չեն ունենում, և սա այդ օրինակներից մեկն է»,- ընդգծեց Պապոյանը:

Հայաստանում հանքարդյունահանման իրականացմանն առնչվող քննիչ հանձնաժողովի գործունեությունը ձախողվել է: Այդ մասին ԱԺ ամբիոնից հայտարարեց «Իմ քայլը» խմբակցության պատգամավոր Բաբկեն Թունյանը: Նա շեշտեց, որ քննիչ հանձնաժողով ստեղծելը չպետք է լինի ինքնանպատակ: 

«Հանձնաժողովը պետք է պարզեր այս ընկերությունների ֆինանսական և այլ հաշվետվությունների օրինականությունը, հիմնավորվածությունը, ապացուցողականությունը, արժանահավատությունը: Պարզե՞լ ենք՝ չենք պարզել, որովհետև դա պարզելու համար մենք ռեսուրսներ չունենք: Ընդ որում՝ ես այս մասին հարց եմ ուղղել այն ժամանակ, երբ քննարկվում էր այս հանձնաժողովը ստեղծելու հարցը»,- ասաց Թունյանը՝ ընդգծելով, որ հարցրել է, թե, օրինակ, հանրահայտ աուդիտորական ընկերության կողմից աուդիտի ենթարկված հաշվետվողականության արժանահավատությունը ստուգելու համար մենք բավարար մարդկային և մասնագիտական ռեսուրսներ ունե՞նք, թե՞ չունենք:

«Մեզ հավաստիացրել են, որ ունենք այնպիսի մասնագետներ, որոնք պատրաստ են անվճար աշխատել և իրենց եզրակացությունները ներկայացնել: Ցավոք, հանձնաժողովի աշխատանքի ընթացքում ես ինքս նման որևէ մասնագետի չտեսա: Ես տեսել եմ միայն բնապահպան ակտիվիստների, որոնք գալիս էին, խոսում էին ընդգծված մեկ թեմայի շուրջ, որից հետո այդ մեկ թեման դառնում էր հիմնականում լուսաբանման առարկա: Հաշվեքննիչ պալատին ուղարարկվել է հարցում, որ իրենց մասնագետները ներգրավվեն. իրենք բնականաբար մերժել են: ՊԵԿ-ի հետ կապված ես ինքս պարոն Անանյանին չեմ խնդրել, որ գա, որովհետև ինձ նախ և առաջ ավելի շատ հետաքրքրում էր լսել ոչ թե ՊԵԿ-ին, այլ, օրինակ, էդտեղ ընդգրկված որոշ հանքարդյունաբերական ընկերությունների տնօրեններին: Ինձ հետաքրքիր էր իմանալ՝ եթե խոշոր հանքարդյունաբերական ընկերությունը, որը վնասով է աշխատում, բայց տարեկան մի քանի միլիարդ դրամ գումար է ուղղում բարեգործական ծրագրերին, դրանք ինչ բարեգործական ծրագրեր են: Ցավոք, այդ հնարավորությունը չունեցանք»,- ասաց Թունյանը՝ շեշտելով, որ եղած փաստաթղթերն էլ բավարար էին, որ որոշ եզրակացություններ արվեին:

Թունյանը նաև տեղեկացրեց, որ առանձնացրել էին հինգ հանքավայր՝ հավասար հետազորոտություն կատարելու համար, ու բաշխել աշխատանքը հանձնաժողովի անդամների միջև: Պատգամավորի խոսքով՝ հինգի մասով էլ բավարար ինֆորմացիա չեն ստացել: