Հայաստանում ռուսական արտադրության «Սպուտնիկ V» պատվաստանյութով պատվաստվածների մոտ որևէ բարդություն չի գրանցվել: Ասուլիսում այս մասին նշեց ՀՀ առողջապահության նախարարության հիվանդությունների վերահսկման և կանխարգելման ազգային կենտրոնի գլխավոր տնօրենի տեղակալ, իմունականխարգելման ազգային ծրագրի ղեկավար Գայանե Սահակյանը, ով նույնպես պատվաստվողների թվում է եղել:
«Մենք ստացել ենք օգնություն 15 հոգու համար, այո, առողջապահության նախարարից բացի, այլ անձինք ևս պատվաստվել են, այդ թվում՝ նաև ես: Որևէ մեկի մոտ հետպատվաստումային անբարեհաջող դեպք չի գրանցվել: Նույնիսկ հաճախ խոսվող ռեակցիան, այն է՝ ներարկվող հատվածում կարող է առաջանալ կարմրություն, տեղային ցավ, չի նկատվել»,- ասաց Գայանե Սահակյանը:
Նրա խոսքով՝ իրենց ձեռքի տակ է «Սպուտնիկ V»-ի կլինիկական փորձարկումների գործը, ըստ որի, առաջին դեղաչափից հետո արդյունավետությունը գնահատվել է 91.4 տոկոս, երկրորդ դեղաչափից հետո այն հասնում է 94 տոկոսի:
«Մեկ եզրույթ էլ կա, պատվաստանյութը հիմնականում կանխում է մահացությունը և ծանր կլինիկական դրսևորումը: Կարող է մարդը վարակվել, թեթև կլինիկական ընթացք ունենալ, բայց դա չի նշանակում, որ պատվաստանյութն արդյունավետ չէ»,- նշեց Գայանե Սահակյանը:
Հայաստանում արդեն կա պատվաստանյութի ձեռքբերման գործող պայմանագիր` ասուլիսի ընթացքում տեղեկացրել է ՀՀ առողջապահության նախարարության Հիվանդությունների վերահսկման և կանխարգելման ազգային կենտրոնի գլխավոր տնօրենի տեղակալ Գայանե Սահակյանը:
Հայաստանում նախևառաջ կպատվաստվեն բարձր ռիսկայնություն ունեցող խմբերը, ըստ մասնագետների՝ բնակչության 10 տոկոսը: Պատվաստանյութերի ձեռքբերման բանակցություններ են վարվում ռուսական և արևմտյան ընկերությունների հետ: Բանակցություններ են ընթանում այն պատվաստանյութերը ձեռք բերելու ուղղությամբ, որոնք անցել են անհրաժեշտ հետազոտություններն ու փորձարկումները՝ «Սպուտնիկ V»-ն, Pfizer-BioNTech-ը, «Մոդեռնա» ընկերության պատվաստանյութը, AstraZeneca-ը:
Ըստ Գայանե Սահակյանի՝ պատվաստանյութի առաջին խմբաքանակը հանրապետությունում կլինի մինչև փետրվարի առաջին կեսը:
Թեև այսօր Հայաստանում համաճարակային իրավիճակի մեղմացում կա, մեր երկրում կարանտինը երկարաձգվել է ևս 6 ամսով:
Մասնագետները այս երկարաձգումը պայմանավորում են աշխարհում տիրող իրավիճակով և կանխատեսում են, որ Հայաստանում նույնպես կարող է լինել կորոնավիրուսի երրորդ ալիքի բռնկում:
Այժմ որոշակի սրում է սպասվում նաև Նոր տարվա և դպրոցների բացման հանգամանքով պայմանավորված: Երեկ ընդունված որոշումը, սակայն, կարանտինի հետ կապված որոշ սահմանափակումների մեղմացում է նախատեսում:
Եթե նախկինում Հայաստանի քաղաքացիները և օտարերկրացիները մեր երկիր կարող էին մուտք գործել միայն օդային ճանապարհով և առավելագույնը 72 ժամ վաղեմությամբ բացասական թեստով, նոր որոշմամբ Հայաստան մուտքը հնարավոր է նաև ցամաքային ճանապարհով:
ՀՀ ԱՆ հիվանդությունների վերահսկման և կանխարգելման ազգային կենտրոնի գլխավոր տնօրենի տեղակալ Նունե Բակունցի խոսքով՝ երկրորդ գլոբալ փոփոխությունը, որն արվել է այս որոշմամբ, մեղմացվել են հակահամաճարակային միջոցառումները:
«Այսինքն՝ մենք ունեինք որոշակի սահմանափակում ոչ կոմերցիոն նպատակներով իրականացվող հանրային միջոցառումների՝ համերգներ, տոնախմբություններ, ինչպես նաև թաղումներ, հարսանիքներ, նման տեսակի հավաքների ժամանակ առկա էր սահմանափակում՝ մինչև 60 հոգի: Երեկվա որոշմամբ այդ սահմանափակումը վերացվել է»,- ասել է Նունե Բակունցը:
