Առողջապահության նախարարությունը մշակել է սահմանափակումների նոր փաթեթ՝ պայմանավորված կորոնավիրուսային հիվանդությամբ: Ինչպես նախարարի պաշտոնակատար Անահիտ Ավանեսյանը այսօր լրագրողների հետ զրույցում ասաց, սահմանափակումները վերաբերելու են հանրային ծառայությունների ոլորտին և պետական աշխատողներին:
«Մենք առաջարկում ենք, որ հանրային ծառայությունների ոլորտի աշխատակիցները ժամանակ առ ժամանակ թեստավորվեն քովիդի դեմ, որովհետև համավարակը տարիուկեսից ավելի է՝ շրջանառվում է: Մշտապես տարբերակներ ենք քննարկում, թե ո՞ր փաթեթը ե՞րբ կիրառելի դարձնել: Այս պահին մենք առաջարկել ենք հանրային ծառայությունների և պետական ծառայությունների աշխատակիցների համար, որովհետև նրանք վարակի տարածման թիրախ են, շատ են շփվում ունենում այլ մարդկանց հետ»,- ասաց նա:
Նոր սահմանափակումներով նախարարությունը առաջարկում է աշխատակիցներին ներկայացնել նաև կորոնավիրուսային հիվանդության դեմ պատվաստված լինելու սերտիֆիկատ: Եթե անձը պատվաստված չէ, ապա պետք է ժամանակ առ ժամանակ ներկայացնի քովիդի թեստի բացասական պատասխան:
Ըստ Ավանեսյանի՝ չնայած կորոնավիրուսային հիվանդության թվերը դանդաղ, բայց նորից աճում են Հայաստանում, դրան զուգահեռ ավելանում է պատվաստվել ցանկացողների տեմպը: Նրա խոսքով՝ պատվաստումային բարձր ցուցանիշով ակտիվ են Շիրակի մարզը, Արմավիրի և Արագածոտնի, Գեղարքունիքի մարզերը: Իրավիճակը մի փոքր ցածր է Վայոց ձորի մարզում, Լոռիում:
