Ուզում եմ արձանագրել, որ, ըստ էության, մենք պետք է հստակ գիտակցենք, որ Ղարաբաղի հարցը գոնե այս փուլում և այս փուլից սկսած` մինչև բավականին երկար ժամանակ, դիվանագիտական լուծում չունի, և բոլոր այն հույսերը, առաջարկները, թե պետք է դիվանագիտական լուծում գտնել, առավել ևս այս իրավիճակում պետք է համարենք ավարտված: Այս մասին այսօր, ֆեյսբուքյան ուղիղ եթերում ասաց վարչապետ Նիկոլ Փաշինյանը։
Վերջինս իր խոսքում մասնավորապես նշեց, որ բազմիցս ասվել է, որ հայկական կողմը հարցը փոխզիջումների տարբերակով լուծելու պատրաստակամություն ունի: Փաշինյանը մանրամասնեց․
«Փոխզիջում նշանակում է, որ մեր դրած նշաձողից, մեր ազգային նշաձողից կարող ենք ինչ-որ բան նվազեցնել` հանուն լուծման, պայմանով, որ դիմացի կողմն էլ իր առավելագույն նշաձողից պետք է ինչ-որ բան իջեցնի: Բայց պրակտիկան ցույց է տվել, և դա այլևս իրականություն է, որ այն, ինչ այս տրամաբանության մեջ ընդունելի է հայկական կողմի համար, այլևս անընդունելի է Ադրբեջանի համար: Այսինքն` նրանց ողջ դիվանագիտական ռազմավարությունը և մարտավարությունը եղել են և շարունակում են մնալ դա:
Այն, ինչի հետ մենք բանակցությունների, ամենատարբեր գործոնների բերումով համաձայն ենք կամ համաձայն կլինենք, դրան Ադրբեջանը համաձայն չէ: Եվ սա ցույց է տալիս, որ ընդհանրապես որևէ դիվանագիտական լուծման մասին խոսել անիմաստ է առնվազն այս փուլում: Ես հետագայում կխոսեմ, թե որ փուլում կարելի է դա հնարավոր դարձնել»:
Անդրադառնալով հայ-ռուսական հարաբերություններին, վարչապետն ընդգծեց, որ այսօր և այս ողջ ընթացքում ինքը շատ բարձր է գնահատում Հայաստանի և Ռուսաստանի համագործակցությունը և փոխգործակցությունը:
«Մենք զգում ենք Ռուսաստանի` որպես ՀՀ-ի և հայ ժողովրդի ռազմավարական դաշնակցի աջակցությունը: Եվ կա մշտական հաղորդակցություն մեր երկրների միջև, մենք հնարավորինս բարձր և արդյունավետ կերպով փոխգործակցել ենք և փոխգործակցում ենք այս իրավիճակից լուծում գտնելու համար։ Ռուսաստանը նաև ԵԱՀԿ Մինսկի անդամ է և, միևնույն ժամանակ, Հայաստանի ռազմավարական գործընկերնը: Ես կարծում եմ, որ այս երկու կարգավիճակի բերումով՝ Ռուսաստանը մինչև օրս արել է առավելագույնը, և համոզված եմ` սրանից հետո էլ կանի ատավելագույնը, չեմ կասկածում։
Կարծում եմ` այս փաստերի համադրումն ակնհայտ է դարձնում մեր անելիքը: Մեր անելիքը պայքարելն է մինչև վերջ և անմնացորդ, անսասան մեր ժողովրդի իրավունքների համար: Անկախ նրանից, թե ինչ տեղի կունենա, պետք է պայքարել մեր ժողովրդի իրավունքների համար: »,- եզրափակեց վարչապետը:
